《解構產科神秘面紗之二-姑娘摸乜野？》
問得好！！其實好多助產士學生新丁都唔知到底加藤鷹之手係摸緊乜嘢
由一入院姑娘就做陰道檢查，個窿黑媽媽又窄，勉強放得入兩隻手指，但其實摸到好多野架！
以一個初產婦來講，開始作動子宮有規律收縮子宮頸會首先變薄，薄到好似紙一樣先至會開度數，但係初產婦黎講，變薄呢個過程可以話係十二分之咁漫長！子宮頸本身又厚又硬，仲有一舊好杰好杰既黏液封住中間個窿，懷孕期間keep住大約4cm厚，係一個把關既士兵防止bb跌出黎，又防止外來物質進入，所以有時姑娘檢查完話'仲好長呀'既意思即係佢仲未變薄哂，變薄呢個階段可以好耐，有d媽媽會形容為「陣痛左兩日喇」，但其實仲可以係好長，變薄完仲要等佢打開！🤦🏻♀️🤦🏻♀️好多媽咪子宮收縮痛就好心急想知道開到幾多度，成日要求姑娘幫佢檢查，但每次檢查都會增加感染既風險架！所以如非必要我地係唔會成日摸架～
同時間我地會摸下bb 既胎位，到底係咪頭向下？再摸下佢既先露部位，即係頭殻頂、後尾枕、膊頭、屎忽定手腳，同埋如果穿水既話，會唔會摸到臍帶，有冇穿到胎膜，即係摸落到底係滑潺潺既胎膜定係鞋颯颯既頭髮，同時睇埋有冇胎水，如果有既係咪清澈定係混左胎糞，如果有胎糞咁有可能bb已經受唔住壓力焗到係入面賴左臭臭喇！係唔係好忙好多野要係果幾秒入面做哂呢？
其實除左摸到頭仔之外，摸到其他野都會係唔同程度既驚嚇！好似我上次收左個已經子宮頸全開既孕婦，穿左水，一摸！GG呀！林既？！再摸真d!有條'那'既？！係屎忽黎架😱😱拎返隻手指出黎仲有胎糞架添😱🙈🙈🙈冇眼睇呀！亦都聽同事講過一摸入去，bb隻手仔捉住同事隻手指，同埋一摸係膊頭！摸到呢d咁特別既先露部位就唯有緊緊緊急入手術室見喇！
#呀b你乖d喇唔好嚇姑娘喇
#呀媽比你嚇到鼻哥窿都冇肉喇
#第一幅圖就訓得最靚喇
#頭向地背向天冇臍帶纏頸胎盤唔低
#祝各位bb都訓得咁靚
#祝各位媽咪順利生仔
圖片fromhttp://www.motherrisingbirth.com/2012/10/31-weeks-cervical-dilation-and-how-to-check-your-cervix.html
Search